الاسكندرية بطعم تاني.....(4)

محمد نفسة يشوف الاسد علي الطبيعة لاني كنت بحكي له عن اسد الغابة وخوف الحيوانات منه والكلام ده يعني بس يا ريتني ما وديتة يشوف الاسد لانه اكيد انصدم لما شاف اسد جنينة الحيوان بالاسكندرية اسد يا عيني ما ايقاف التنفيذ اثار البهدلة وقلة القيمة والمرمتة باينة عليه كلاب الشوارع اوفر منه حظا الجنينة في النزهة وبما اني لا اعرف الفرق بين النزهة والمعمورة كان لازم اسأل وكان لازم اللي اسأله يجاوب ويفتي ويتوهنا معاه يعني لو قال ماعرفش مش كان ريحنا المهم بعد ما افتوا الاخوة العرب سألت واحد تالت واخدت برأية وانطلقنا في المواصلات مكروباص اتنين تلاتة ووصانا بحمد الله الي الجنينة اول قفص قبلناه كان لعمنا الفيل محمد اول ما شافة اسبهل وقالي ده كبيير اوي يا بابا عن التليفزيون قصده عن اللي بيشوفة في التليفزيون قولت له ايون يا حبيبي هوه ده الفيل اللي بحق بس يا عيني الفيل بضخامتة وجبروته الحارث بيأكله فينو ناشف مصوف ويا عيني شكله مجوعه من صباح ربنا عشان لما حد يحب يأكله يتلهف علي الاكل اكتشفت بعد ذلك من خلال رحلتي داخل الجنينة ان رزق العمال من خلال الزوار اللي يحبوا يوكلوا الحيوانات بايدهم عشان كده تلاقي الحيوانات كلها جعانة وملهوفة علي الاكل بطريقة تخليك تعيط خاصة لما تشوف الاسد مثلا وهوه هيعيط عشان توكله لو قدر يا عيني يبوس ايدك هيعملها اكل العيش مر فما بالك بأكل اللحمة حاجة بصراحة تقطع القلب معروف ان الاسد لو اكل وشبع ما بيسألش في حد حتي لو فتحت بقة بالعافية وحطيت راسك فيه الاسد مش طفس طالما اكل خلاص لاكن يا عيني الاسود في جنينة حيوان النزهة شكلهم عمرهم ما شافوا لحمة قبل كده اكيد طبعا الحارس اللي مش لاقي حتة لحمة هيوكل الاسد لحمة ويقعد هوه وولادة بالجوع بصراحة اسود الجنية تحس انهم من الصوماال وعيشين المجاعة تضامنا مع اهل الصومال المهم عشان توكل عمنا الفيل وتنول ذالك الشرف ادفع للحارث ون بوند مصري وهتلاقي الفيل طلعلك زلومته ومستنيك علي احر من الجمر عشان تحطله حته فينو ناشفة مصوفة وخد صورة كمان وانت بتعمل الاعجوبة دي يا حلاوة ومن الفيل الي سيد قشطة يا قلبي لا تحزن سيد قشطة مش قشطة خالص ده حالة حاله مبدئيا في بحيرة للباشا بس عشان يعمل بلقمته حابسينة في قفص ومجوعين امه علي الاخر وعاملين فتحة مقاس بقة في نصها سيخ حديد يعني عمك سيد لازم يحط فك من فوق السيخ وفك من تحته وانت بقي تحط له البطاطس في بقه يروح المسكين يضم الفكين علي البطاطس والحديد وتسمه ترقعة الحديد بين ضروسة وعشان طبعا يتذل الذل ده كله اكيد ليه علي الاقل يومين ما داق الزاد وعلي لحم بطنه عشان الباشا الحارث ياخد الجنية ويسمحلك توكله عليه العوض في سيد قشطة اللي مش قشطة خالص حارث الشمبانزي مريح دماغة القفص ليه بوابة واقف علي البوابة ويقولك ببساطة التذكرة بنص جنية طبعا مفيش تذاكر هوه مع نفسه نفسك هفاك تشوف شمبانزي ولا المدام بتتوحم ادفع نص جنية واشبع من جمال امه الشمبانزي شكله مكفهر ويبصلك بأسي وعينه مليانة حزن شديد عايز يقولك انا عملت ايه في دنيتي عشان يجوبوني هنا عليه نظرة عين ولا الموناليزا
حتي الطيور مجوعينها وواقفه طابور مستنيه حد يأكلها وعشان مفيش رغبة اوي من الزوار بالطيورتحس انهم بيكلموا الحارث والنبي يا عم اكلنا ينوبك ثواب الناس مش راضي تأكلنا اكلنا انت وخلاص معلش بس لسان حال الحارث ابدا علي جثتي هيدفعولكم وقلبهم يحن هتاكلوا مش هيحنوا خليكم بالجوع انتم احسن يعني من الاسد ولا الفيل ولا سيد قشطة اللي بياكل الحديد وكله كوم وبيت الزواحف كوم تاني تذ1كر ميري ورسمي اتنين جنية مفيش مشاكل الزواحف تستاهل اكتر من كده ودخلنا البيت وعينك ما تشوف الا النور البيت عبارة عن كام تعبان من اللي بتشوفهم حواليك في اي خرابة وزاد الطين بله قال ايه فيران بيضة ادفع اتنين جنية تذكرة مخصوص عشان اشوف فيران بيضة كانوا قالولي كنت جبت لهم زكيبة فيران عموما الزواحف انقرضت من زمان وده اللي بقي منها غصب عنهم برضة هيجبونا منين زواحف غير من البيئه المحيطة ويمكن في ناس عمرها ما شافت الفيران اهو تبقي مناسبة سعيدة وذكري حميدة والفار الابيض ينفع في اليوم الاسود باقي الحيونات يظهر والله اعلم مش بينفع معاها نظام الجوع او بتستحمل الجوع لفترات طويلة ومش بتتهافت علي الاكل عشان كده سايبنها في حالها لا حارث واقف عليها ولا هيه معبرة حد مع نفسها علي الاخر براحتها تدخل القفص من جوه ولا تشوف امها الا بمزاجها لما تطلع تشم هواء وممكن ساعتها تشاور لها من بعيد هاااي وفجأة العيال صرخوا ملاهي يا بابا فين يا ابني انت وهوه اهه يا بابا بصيت لقيت اربع لعب من العاب الملاهي بصراحة اخر مسخرة جزء ضيق من الجنينة حاطين فيه الالعاب مزنقينهم في بعض تطلع من لعبة تتكعبل في التانية عربيات لعبة بالكهرباء عمرها الافتراضي شكله انتهي من زماان وايه مفيش اي درجة اماان يعني المفروض العربيات دي يركبها الكبار مش الاطفال لاكن طبعا اي حد يدفع هيركب سواء طفل اوبغل كله بفلوسه المهم طفل صغير حوالي سنتين ركب مع اخوه حوالي 4 سنين وفي اول خبطة للعربية اتفتحت دماغة عاادي خالص يبقي انت اكيد في ملاهي مصر الاخطر من كدة المراجيح عبارة عن اسطوانة يتدلي منها سلسلتين بمرجوحة وهكذا وتركب يا باشا وتمسك بايدك السلاسل وتثبت اوي وتلف الاسطوانة وترتفع بيك المرجوحة وتلف وانت في الهوا ولو دخت وده وارد جدا وايدك سابت السلاسل هتلاقي نفسك طاير في الهوا شاشي يا وله وانت ونصيبك ساعتها غرز كسر قطع رقبة الدنيا حظوظ يبقي ساعتها انت اكيد اكيد في مصر لفت انتباهي يفطة ظريفة ركوب السيسي ب2 جنية رسمي يا باشا بس طبعا من غير تذاكروالسيسي يا حضرات لمن يهمة الامر حصان قصير مجرد بس ما تنول شرف انك تركبة تدفع الاتنين جنية بلاها سيسي اركب ......ولا بلاش بلاها سيسي بلاها سيسي وشفنا القرد اللي يا عيني المنطقة الحمرا كلها قرح وطبعا يستاهل اصله عايش في الجبلاية ومفيش فرصة انك تدفع للحارث عشان تأكله يبقي يعاني بقي من القرح من الجوع من العطش ايه اللي خلاه يسيب الاقفاص اللي كلها رزق ويعيش في الجبلاية مع بقية القرود خلي القرود تعالجه وانتهت رحلة الجنينة علي خير وحمدنا ربنا اننا عايشين احسن من الحيوانات عشان محدش يقول ان الحيوانات عايشين احسن مننا هذا كذب وافتراء علي الحكومة الذكية كله انيل من بعضه كلنا في الهوا سوا وللحديث بقية