فاكر يا ابني

فاكر يا ابني اكتوبر والعبور والنصر
فاكر لما رجعنا الكرامة لمصر
فاكر جدك لما استشهد ساعة العصر
انا مش فاكر غير جدو وابوتريكة وسونج
وحمص لما في ايطاليا جاب النصر
فاكر يا ابني السد وجمال عبد الناصر وطلوع الفجر
انا مش فاكر غير سوزان وهشام طلعت وفلوس طلعت بره مصر
فاكر يا ابني بورسعيد والعدوان وعيد النصر
انا مش فاكر غير المصري اللي ه يهبط لو ما حققش اي نصر
فاكر يا ابني التاميم واراضي رجعت للفلاحين بالمتر
انا مش فاكر غير مارينا وشرم وناس بقيت اقوي من صلاح نصر
فاكر يا ابني الثورة وسعد وعلامات النصر
انا مش فاكر غير تامر حسني وهيفا وهز الخصر
فاكر يا ابني البنية التحتية والمترو ومحاربة الفقر
انا مش فاكر غير حرايق مجلس الشوري والمسرح والقطر
فاكر يا ابني الجامع والكنيسه والوحده طول العمر
انا مش فاكر غير فتن بتقصف العمر
فاكر يا ابني لما ابوك زاد النص لما مرتبه زاد العشر
انا مش فاكر غير العشة فوق السطح واللحمه حلم حياتي ويا الفاكهه اول الشهر
فاكر يا ابني مصر الريادة والزعامة والقدر
انا مش فاكر غير ماتش الجزاير والجمهور اللي انضرب
فاكر طب يا ابني حب مصر
انا مش فاكر غير الدويقه والعبارة وشباب هاربة وسط البحر
فاكر يا ابني طب القمر
انا مش شايف غير القبر
فاكر يا ابني جمال مبارك اخرة الصبر
طب بس خلاص الدنيا حر