يلا نحسبها
نبتدي منين الحكاية نخش في الموضوع
المرتب 450 جنية مصري خلي الدماغ صاحي
مصري مش بالدولار ولا اليورو 450 جنية بعد12 خدمة في ثانوي قصدي في وزارة الصحة والسكان يا بلاش صحيح عظيمة يا مصر يا ام النعم نيلك هيخلص قصدي ده سكر+600جنية نوبتجيات أي نوبتشيات مع العلم أن الواحد بياخد الحد الاقصي من النوبتجيات علشان يزود دخلة يعني نوبتجية يوم ويوم يعني يوم في البيت ويوم في الغيط قصدي المستشفي يعني نص عمر الواحد يقضية في المستشفي ويديلك بدل عدوي اقل من 20 جنية يعني يجيلك التهاب كبدي فيروسي وينقصف عمرك بدري بدري غير العذاب اللي تشوفة قبل ما ترحل يا حبيبي بعشرين جنية شهريا+180 حوافز يكون المجموع الكلي 1230 يعني من الاخر اوعي وشك
المطلوب يا سادة يا كرام علشان الواحد يعيش عيشة محترمة علشان الواحد دكتور قد الدنيا والدكتور راح والدكتور جية وسع يا وله للدكتور مصاريف بسيطة جدا جدا
يلا نحسبها
الاكل اي المم أي الطعام
الفطار بما اني راجل متربي علي العز والعز عز والفقر كتاكيت كاك كاك
الفطار يا جدعاااان فول ساندوتشين فوووول اوما شابه30 جنية شهريا والمدام والعيال يكلوا نفسهم بقي مش مهم
الغداء
متوسط اربعة كيلوا لحمة وفرخة +يوم عدس ويوم بصل 200 جنية غير السمن والذي منة
الخضار متوسط 100 جنية شهريا بدون السلطات أو أي إضافات اخري
العشاء
ربع كيلو جبنه بيضا غير الجبنه النستو للعيال غير المربي يا معلمي علي نفسهم في المناسبات ااو جبنة رومي لزوم الرفاهية الغير مقبولة وبدون اي رتوش يكون العشاء حسبة 200 جنية غير الفينو لزوم الساندوتشات
للبيبي
بامبرز اجباري من غير خيارات شهريا حوالي 70 جنية ولا غني عنه ولا استغناء
كهرباء ومياه غازية 50 جنية
30 جنية وصلة نت معلش غصب عني مش بايدي محدش يقول لازم النت وبلاوي النت
ادوية ومسكنات لنزلات البرد والاسهال والصداع المزمن بقيمة 30 جنية شهريا وده المتوسط السنوي علشان محدش يقول كل شهر نزلة لا يا سيدي ده المتوسط ومع العلم الكشف مجاني
50 جنية قيمة الاتصالات بالمحمول بعد الامتناع عن سداد فاتورة التليفون الارضي لظروف خارج نطاق الخدمة
50 جنية متوسط مصروف العيال من الحلوي والشيبسي والدولسي في أيام الحر الصريح لطفلين في عمر الزهورفقط لا غير هذا هو المدون في الدفاتر الرسمية مع العلم ان المبلغ الاصلي اضعاف هذا الرقم لان النفس اماره بالسوء والشكولاتة وأشياء من هذا القبيل
اني ابتليت باربعة النفس والدنيا ومالي والهوي
صابون لزوم النضافة النضافة حلوه برضة حماية من الانفلونزةخنازير وطيور وخلافة واريال للغسيل 20 جنية شهريا خلي علينا واغسل الباقي في الترعة حداكم
400 جنية أيجار شقة علي النيل (النيل بتاع الصعيد حدانا مش النيل بتاعكم)3 اوض وصالة يرمح فيها الخيل أيجار مؤقت قابل للزيادة الاجبارية كل خمس سنين
فسحة للأولاد والبند ده لو هيدايكم ممكن نحذفه من مضبطة المصروفات 100 جنية
مواصلات شهريا 60 جنية وده طبعا نص المواصلات والباقي كعابي موتورجل وبالتالي محتاج ولا مؤاخذة تغير الجزمة بصفة مستمرة وده بند لوحدة
فاكهة اصل العيال نفسهم فارغة عايزين زي الناس الوحشة فاكهة مع التحذير المستمر من خطورتها علي الصحة العامة بقيمة 50 جنية يعني مرة في الأسبوع مرة يا بشر من الفاكهة المحترمة بعيدا عن التفاح والمانجو لقلة ادبهم
كده يكون المجموع الكلي للمصاريف 1440 من 1230 يكون الفرق بالسالب 210
يعني مطلوب اني أشحت أو بلفظ ارق استلف شهريا 210
ده طبعا غير لسه مصاريف المدارس والدروس الخصوصية اللي عايزة مرتب وحده ومن غير ملابس لزوم الصيف والشتاء والاعياد والاحذية حتي لا نكون حفاة عراه وطبعا المفروض نعمل حساب بكرة والعيال اللي عايزين يتجننوا ويتجوزوا ومصاريف الجامعة اللي مش هيدخلوها طبعا ومن غير اي مصاريف طارئة يعني كباية اتكسرت مثلا رجل كنبة اتخلعت مع العلم إن دي مصاريف واحد عايش في الصعيد اي مصاريف حنينة فبند المواصلات لواحد عايش في القاهرة الكبري عايز مرتب تاني لوحدة
والآن عروستي لو عرفت الحل اتصل ب 090000000
والجايزة بامبرز للبيبي وشكرا
سلام
ليست هناك تعليقات:
إرسال تعليق